جی سی ایس ای (میٹرک) … محمد یونس

جی سی ایس ای (میٹرک)

نوشتہ: محمد یونس
دہ یوکے، ہر سال دہ مای جون امتحانای جی سی ایس ای یعنی میٹرک (دہم) موشنہ۔ دہ اینجی میڑک امتحان رہ جی سی ایس ای موگہ۔ ای امتحان دہ مدتِ دو سال یعنی دہم و یازدہم موشنہ۔ بعض پرچہ دہ سالِ دہم موشنہ و بعض شی دہ سالِ یازدہم موشنہ۔ دہ بینِ تمام پرچہا تقریبن یک، دو یا سہ روز وقفہ استہ۔
تمام طالب علما دہ سکول خو امتحان میدیہ۔ ٹیچنگ سٹاف امتحان نمیگرہ۔ برای امتحان الگ آزاد سٹاف استہ۔ اگر امتحانی سٹافِ سکول کم شونہ اونا از ٹیچنگ ایجنسی سٹاف میگرہ۔
دہ دو سال از تمام مضامین تقریبن پونزدہ پرچہ موشنہ۔ ہر پرچہ از خود مختلف وقت درہ۔ یگوی شی یک نم ساعت (گھنٹہ) استہ، یگوی شی یک ساعت چیل پنج منٹ، یگوی شی دو ساعت و یگوی شی دوی نم ساعت استہ۔
برای کم لائق یا دہ الفاظِ دیگر نالائق طالبعلما کم آسان یعنی فاونڈیشن پرچہ استہ و برای لائق کم سخت ہائر لیول پرچہ استہ۔ اکثر طالب علما بلے پرچہ نوشتہ مونہ البتہ اگر یگو طالب علم نوشتے (رائٹنگ) شی خراب استہ اونا تمام جوابات خو بلے کمپیوٹر ٹائپ مونہ۔ اگر یگو طالب علم درسی (لرنِنگ) یا اعصابی مشکلات درہ اونا رہ دہ اصطلاحِ انگریزی ڈیسلیکسیک، آٹیسٹِک، ای ڈی ایچ ڈی یا اے ڈی ڈی طالبعلم موگیہ یعنی اونا از لحاظِ خاندو یا نوشتہ کدو کمزور استہ و برای ازونا مختلف قسم (آسان) پرچہ استہ و اونا رہ بیست پنج فیصد وقت زیاد میدیہ چراکہ پرچہ خاندو و نوشتہ کدوی ازونا آہستہ استہ۔ ای رقم طالب علما دہ الگ کمرہ ای امتحان میشنہ و اگر یگوی ازونا پرچہ رہ خاندہ یا نوشتہ نمیتنہ برای ازونا مخصوص انویجیلیٹرز کہ دہ نامِ سکرائب استہ موگیہ۔ کارِ سکرائب انویجیلیٹر پرچہ خاندو یا نوشتہ کدو استہ چراکہ ای رقم طالب علما پرچہ رہ درست خاندہ و درست نوشتہ نمیتنہ۔
سکرائب انویجیلیٹر از پرچہ شروع کدو پیش از طالب علم پرسان مونہ کہ اونا چی رقم کومک میخایہ۔ اگر طالب علم دہ خاندو کمزور استہ سکرائب انویجیلیٹر تمام سوالای پرچہ رہ برای ازونا میخانہ و طالب علم آہستہ آہستہ خود شی سوالِ جواب رہ نوشتہ مونہ و اگر طالب علم از نوشتہ کدو کمزور استہ اونا تمام جواب رہ لفظ بہ لفظ بمعہ مشکل سپیلنگ سکرائب انویجیلیٹر رہ موگیہ و انویجیلیٹر برای ازو بلے پرچہ جواب شی نوشتہ مونہ۔
وقتیکہ پرچہ ختم شود سکرائب انویجیلیٹر بلے یک فارم وری کاغذ نوشتہ مونہ کہ اونا چی رقم طالب علم رہ کومک کد۔ بعد ازو اونا بلے کاغذ دستخط مونہ و از طالب علم ام دستخط میگرہ۔
نالائق بچائ شوخ و مست رہ دہ الگ کمرہ (اطاق) میشندنہ و ازونا الگ امتحان میگرہ تا امتحانی ہال یا کمرہ ڈِسٹرپ نشنہ۔ اگر یگو طالب علم کمرہ ای امتحان رہ ڈِسٹرپ کنہ اونا رہ سہ دفعہ وارننگ میدیہ۔ اگر بسم از گوفت نشود ایگزام آفیسر پرچے ازونا رہ کینسل مونہ۔ البتہ ایتر واقعہ بسیار کم موشنہ۔
دہ بروی امتحانی ہال یا کمرے امتحان بلے یک کلان کاغذ سیٹنگ پلان رہ بلے دیوال میچسپنہ۔ تمام طالب علم از امتحانی ہا داخل شودو پیش سیٹنگ پلان رہ خاندہ امتحانی ڈیسک خو پئیدا مونہ کہ دہ کجا و دہ کودم نمبر یا قطار استہ۔ وقتیکہ بچہا و دخترو درونِ یک کلان امتحانی ہال یا کمرے امتحان قد بستای خو داخل موشنہ اونا بستای خو یک طرف کنارے دیوال میلہ و بعد ازو ہر طالب علم سیدھا طرف ڈیسک خو مورہ۔ یگو انویجیلیٹر از طالبعلم تلاشی نمیگرہ۔ بلے ڈیسک ازونا یک ریزہ پلاسٹکی پرچی استہ کہ بلے شی فوٹو، نام و رول نمبر (امتحانی نمبر) ازونا استہ۔ بلے ہر ڈیسک یک پلاسٹکی جیومیٹری باکس استہ۔ مینے جیومیٹری یک کالکولیٹر، بال پوئنٹ، پنسل، ربر، فٹ، کم پاس (پرکار)، ڈی (پروٹیکٹر) و پرچہ کہ دہ شکلِ یک کتابچہ وری استہ، بلے ڈیسک استہ۔ اکثر پرچہا از خود الگ کوئیسچن پیپر (سوالنامہ) ندرہ تمام سوالہا دہ درونِ پرچہ نوشتہ استہ۔
ہر طلب علم دہ قراری رول نمبرای خو توخ کدہ بلے چوکیای (ڈیسکہای) خو میشنہ۔ پنج منٹ از پرچہ شروع کدو پیش، ایگزام آفیسر طریقہ کارِ امتحان رہ از روی ورق خواندہ تمام طالب علما رہ موگیہ۔
دہ درونِ امتحانی ہال چپراسی نیستہ۔ بلے انویجیلیٹرا چوکی ام نیستہ۔ تمام انویجیلیٹرا ایستہ موشنہ یا درونِ امتحانی ہال راہ میگشتہ۔ دہ گزشتہ چار سال ما یک طالبعلم رہ ندیدوم کہ نقل کدہ باشہ بخاطریکہ دہ اینجی کلچرِ نقل نیہ۔ اگر طالبعلم یاد درہ نوشتہ مونہ اگر یاد ندرہ نوشتہ نمونہ۔
اگر یگو طالبعلم نمبر شی کم بایہ یا فیل شونہ اونا چند ماہ بعد امو پرچے خو دوبارہ امتحان میدیہ۔ حکومت حتی المکان کوشش مونہ کہ تمام طالبعلما رہ دہ مطابقِ خوی و قابلیت شی برابر موقع بیدیہ تا اونا جی سی ایس ای (میٹرک) امتحان رہ پاس کنہ۔

محمد یونس

یونس دہ کاڈیف، يوکے زندگی مونہ و دہ کالج انگلیسی درس میدیہ۔ اونا آزرگی زبان رہ خوش درہ و بیشتر دہ آزرگی زبان نوشتہ مونہ۔
Please click below to read more stories in Hazaragi language www.myounas.com
محمد یونس

محمد یونس

یونس دہ کاڈیف، يوکے زندگی مونہ و دہ کالج انگلیسی درس میدیہ۔ اونا آزرگی زبان رہ خوش درہ و بیشتر دہ آزرگی زبان نوشتہ مونہ۔ Please click below to read more stories in Hazaragi language www.myounas.com