زبان یگ آلہ/ طلاء چنگیزی

زبان یگ آلہ

طلاء چنگیزی

زبان یگ آلہ استہ کی انسانها برائے رابطہ استعمال مونہ و امزی ہتھیار یا صلاحیت کار گرفتہ انسان چند صد ہزار سال پیش راہ خو از دیگہ “دنیا حیوانات” جدا کدہ یگ نو شناخت خو جور کد۔ امی صلاحیت زبان مو رہ دہ بنیاد شعوری عقلی و علمی یگ ارتقاي سبقت نہ صرف دہ بلے دیگہ حیوانات داد بلکہ بعدأ امی برتری رہ دہ مختلف انداز دہ بلے یگ دیگے خو حاصل کدی۔

دہ فکر مہ یگ زبان فقط دہ بنیاد ضوابط و معیارات زبان شناسی جور نہ موشنہ دہ ای بارہ دیگہ عوامل مثالا سیاسی، سماجی، جغرافیائی و قومی شناخت واری تفاوتہا ام اثر انداز شدہ میتانہ۔ دہ مختلف مناطق جہاں ای رقم زبونا و قومیتها وجود درہ کی زبان یگ دیگے خو رہ موفامہ و گفتہ ام میتانہ لیکن از علت‌هایی سیاسی اور قومی او دہ دو مختلف زبان شناختہ موشنہ اور دہ دنیا ایتر زبونا ام استہ کی مردوم طورے یگ دیگے خو رہ ہیج پیی نہ موفتہ لاکن از فشار سیاسی مجبورا زبان خو رہ یگ زبان قرار میدیہ۔ یگ مثال ازی زبونای ڈچ و فلیمش و جرمن، استہ کی اونا دہ دیگے خو دہ لحاظ فرہنگی بسیار زیاد قریب استہ لیکن دہ بنیاد سیاسی مختلف زبان شناخت موشنہ۔ دہ ملک چین مندارین اور دیگہ مقامی چینائی گفتنی والا ہر چند یگ دیگے خو رہ نہ موفامہ لیکن دہ تحت فشار سیاسی دہ زمرے یگ زبان مایہ۔ امی رقم ہندی و اردو ام استہ کی گرچہ نوشتہ مختلف موشہ لیکن مردوم کی ای دو زبونا طورہ موگیہ اونا بے یگو مشکل گپ یگ دیگرو خو رہ موفامہ و گفتہ ام میتانہ۔ لاکن از تعصبات سیاسی و مزہبی مردوم ای رہ دو مختلف زبان قرار میدیہ.

دہ ای بنیاد ہر قوم اگر ہمت و جرات نشان بیدہ و کمر خو ٹنگ کدہ تصمیم بیگرہ و زبون خو یگ جدا شناخت دادہ میتانہ۔ ہزارگی الفبا دہ ای جانب اولنہ قدم استہ و قابل قدر استہ۔ ای رقم کارہا بسیار زیاد وقت و تحقیق دہ کار درہ۔ جلدبازی، تضحیک و ضد بجاے کار رہ پیش بوبرہ طرف خرابی موبرہ۔ الفبا رہ اگر مو فقط دہ بنیاد پونولوجی ترتیب بیدی و تعداد ازو رہ محدود بیلی ای “ایکسپریسو و کوگنیٹو ویلوو” زبان رہ کم رسا مونہ۔ زبان باید مثل گفتنی والا خو ای رقم زندہ باشہ کی معلوم شنہ کی نفس میگرہ. و یگ زبانِ زندہ ای نشانی شی استہ کی او دہ بنیاد تعصب نہ بلکہ دہ بنیاد فکر رسا وجود خو قایم بیلہ۔ زبان کی ہر قدر دامن شی وسیع بود او اموقس ارزش و قدر پیدا مونہ۔ انگلیسی یگ بین المللی زبان استہ لاکن ہر سال قریبا ۱۰۰۰ نو الفاظ دہ لغت خو شامل مونہ۔ الی ام مو از او رفیقا دست بستہ گزارش مونی کی اونا باید فکری و فرہنگی بالیدگی و روشنفکری رہ ثبوت دادہ نہ صرف تنقید رہ برداشت کنہ بلکہ اگر یگو اشتباہات شدہ اونا رہ باید درست کنہ. مردوم و قوما گل کی دہ ہزارہ جات زندگی مونہ ( امو اکیڈمک افراد قوم کی دہ ای بارہ دلچسپی درہ ) باید ازونا رہ ام دہ ای بارہ مشورہ خاستہ شنہ خو ہیچ بد نیہ. چرا کی اونا از تمام کلان سٹیک ہولڈر ازی قضیہ استہ.
بعضی رفیقا ای سوال مونہ کی چون ہیچ کدم مو دہ مورد زبان شناسی پی ایچ ڈی نہ کدی لہذا باید دہ ای مثلہ گپ ام نزنی۔ دہ خدمت ازونا گزارش استہ کی دہ بارے سیاست، معیشت و سماجی مسایل ہر کدوم مو چند چند ساعت بے تکان گپ میزنی لیکن او وقت ای سوال پیدا نہ موشنہ۔ اموتر کی براے سیاسی مسایل گپ زدو یگو ڈگری نہ بلکہ صرف یگ فرد و یگ ووٹ دہ کار درہ اموتر دہ بارے الفبا گپ زدن فقط ای چیز مہم استہ کی چون ازرگی مشترکہ زبان کُلگی مو استہ۔ ازی لحاظ باید ہر ہم زبان کی ازرگی موگیہ ای حق رہ داشتہ باشہ کی دہ ای بارہ رائے خو رہ بیدیہ۔ تشکر۔
دہ شیو یگ ویڈو ام شیر کدوم

Leave a Reply

Your email address will not be published. Required fields are marked *