سالویشن آرمی ۔۔۔ محمد یونس

٭
چاشت بود۔ طرفِ دروازہ رافتوم۔ یگ لیٹر دہ دانِ دروازہ پورتاو بود۔ لیٹر رہ گریفتہ خاندوم — دوبارہ دہ غور خاندوم۔ فکر کدوم کہ جای ٹریننگ دہ یونیورسٹی باشہ مگر نہ — ٹریننگ دہ سالویشن آرمی بود۔
آئیڈیے ازونا اوّل خوش مہ نماد کہ اونا چرا ای جای رہ برای ٹریننگ انتخاب کدہ بود۔ دل بے دل ایڈرسِ سالویشن آرمی رہ بلے گوگل میپ ٹائپ کدوم — بعد ازو خوش شودوم کہ جای ٹریننگ نزدیکِ خانہ استہ — یگو بیست منٹ راہ پیدل بود۔
صوبائ شی صوب ساعتای نوینم پیادہ طرف ٹریننگ رئي شودوم۔ غئیدیکہ نزدیک بلڈنگ رسیدوم یگ کلان سرخ خِشتی رنگ و آٹومیٹک شیشہ ای دروازہ برای استقبال مہ موجود بود۔ دروازہ خودبخود واز شود وقتیکہ نزدیکِ دروازہ رسیدوم۔ دہ مینے بلڈنگ از تمام اوّل آوازای بچای ریزہ دہ گوش مہ اماد۔ دہ ای دوران فکر کدوم کہ ما شاید یگو غلط جای امدوم۔
طرفِ ریسپشن رافتوم۔ یگ جوان خوش شکل بلونڈ دختر بلے ٹیلیفون مصروف بود۔ غئیدیکہ اونا از ٹیلیفون فارغ شود اونا طرف مہ موسخندی کدہ توخ کد و دہ خوش اخلاقی گفت، “ صوب بخیر۔ بوگین چی کار درین؟”
ما ام موسخندی کدوم البتہ دہ ای دوران دیستِ راس خو مینے جیب خو کدوم تا لیٹر رہ از جیب خو بور کنوم مگر لیٹر دہ جیب راس مہ نبود۔ زود دہ جیبِ چپ خو توخ کدوم دہ اونجی ام نبود۔ موسخندی از بلے روی مہ دہ پریشانی تبدیل شودہ رئي بود۔ “بوبخشین، یگ منٹ صبر کین،” گفتوم۔
“مشکل نیہ،” اونا دہ خوش اخلاقی گفت۔
غئیدیکہ اونا پریشانی بلے روی مہ دید فورن پرسان کد “بخیالم کہ شمو برای رائٹنگ ٹریننگ امدین؟”
“بلے،” زود گفتوم۔
اونا نام مہ پرسان کد۔ بعد ازو بلے کمپیوٹر نام مہ پیدا کد۔ وقتیکہ نام مہ پیدا کد اونا از بلے چوکی خو بال شود۔ از دفتر خو برو اماد۔ مرا طرفِ متعلقہ ٹریننگ روم بورد۔ اونا پیش رافت۔ ما از پس شی۔ غئیدیکہ اونا نزدیکِ دروازہ رسید اونا دروازہ رہ برای مہ واز کد۔ ما داخل شودوم۔ ٹریننگ دہ یگ کلان ہال بود۔ تقریبن دہ نفر دیگہ ام شیشتہ بود۔ اونا مرہ نزدیک یگ دیگہ جوان خاتو کہ پہلوی یگ میز ایستاد بود بورد۔ تعارف مہ کدہ گفت “اینا ٹیچر شمو استہ۔”
ٹیچر دہ خوش اخلاقی دیست خو پیش کدہ گفت “ویلکم ٹو دہ کورس۔”
دیستای نرم و نازک ازونا رہ دہ دیست خو گریفتہ چمبہ ددوم۔ اونا رہ تشکری کدوم مگر دیست ازونا دہ ای دوران از دیست مہ خلاص شود۔
ٹیچر طرف یگ خالی چوکی اشارہ کدہ گفت کہ بور دہ اونجی بیشی۔ مہ طرف چوکی رافتوم۔ بلے شی شیشتوم۔ دو نفر کہ دہ پہلوی مہ شیشتہ بود قد ازونا سلام دعا کدوم۔
بِلڈینگ مثلِ یگ کمیونٹی سنٹر وری معلوم موشود۔ کلان ہال مثلیکہ برای یگو ٹریننگ جور شودہ بود۔ ما دہ ای دوران بلے بلڈینگ فکر کدہ رئي بودوم کہ ٹیچر پیش اماد۔ اونا خودون خو تعارف کد و دوبارہ تمام رہ خوش آمدید گفت۔ بعد از مختصر گفتگو، اونا مو رہ از ہال برو آوُورد و مختلف اطاقای بلڈنگ رہ نشان دد۔ از تمام اوّل اونا تمام شرکت کنندہا رہ ٹوائلٹ نشان دد کہ دہ کجا استہ۔ بعد ازو اونا ایگزڈ ڈورز رہ نشان دد کہ اگر یگو زمان ایمرجنسی شونہ آدم از کودم دروازہ خود خو از بلڈینگ برو بور کنہ۔
دہ ای دوران، ما مینے یگ اطاق چند نفرا رہ دیدوم کہ اونا بلے کمپیوٹرا مصروف بود۔ ٹیچر گفت کہ ای اطاق برای جاب سرچ و کمپیوٹر یاد گریفتو استہ۔ بعض مقامی مردم دہ اینجی بلے کمپیوٹر برای خو نوکری پیدا کدو و بعض برای کمپیوٹر یاد گریفتو مایہ و سٹاف اونا رہ دہ ای بابت مفت کومک مونہ۔
وقتیکہ مو واپس دوبارہ دہ ہال امادی ما یگ کلان کراس سائن کہ پوشتِ سر مہ بلے دیوال چسپیدہ بود دیدوم۔ کراس سائن تجسس مہ دہ بارے ازی بلڈینگ دوبارہ زیاد کد۔ ٹیچر دہ ای دوران درس ددو شروع کد مگر ما فکرای مہ گوم بود کہ ای چی رقم جای استہ کہ از بروی شی ای کمیونیٹی سینٹر معلوم موشہ مگر درحالیکہ ای چرچ استہ۔
دو گھنٹہ (ساعت) بعد، ٹیچر برای 20 منٹ بریک (وقفہ) اعلان کد۔ ما از ہال برو امادوم۔ حیران بودوم کہ ای چی قسم عمارت استہ۔ دہ امی تجسس از یک طرف معائنے بلڈینگ رہ شروع کدوم۔ چائلڈ نرسری روبروی استقبالیہ بود کہ دہ اونجی چند چائلڈ کئیررز (carers) بچای ریزہ رہ سمبال کدہ رئي بود۔ پہلوی آتش خانہ یگ کمیونٹی کیفے بود کہ مینے شی چند مقامی عمر رسیدہ مرد و زن شیشتہ چای یا کافی خوردہ رئي بود و دہ بین خو نقل کدہ رئي بود۔ پہلوی کیفے یگ چیراٹی شاپ بود کہ دہ اونجی کالہا برای زن و مرد — و کھلونا (Toys) برای بچای ریزہ دیدہ موشود۔
بریک ختم شودہ رئي بود و ما زود واپس طرف ٹریننگ ہال رافتوم۔ ٹیچر رائٹنگ کورس رہ دوبارہ شروع کد مگر ما فکر مہ طرف بلڈینگ بود۔
ساعتای سہ ٹریننگ ختم شود۔ تمام سامانای خو جم کدو و طرف خانای خو رفتو شروع کد۔ ما البتہ طرفِ استقبالیہ رافتوم و از خوش شکل ریسپشنسٹ ریکویسٹ کدوم کہ اگر اونا چند منٹ مرہ بیدیہ۔
اونا دہ خوش اخلاقی ریکویسٹ مہ قبول کد و ما بعد ازو از یگ طرف تمام سوالات خو پرسان کدوم کہ دہ زہن مہ شور خوردہ رئي بود، “آیا ای چرچ استہ یا کمیونٹی سینٹر؟”
“سالویشن آرمی باقاعدہ چرچ استہ مگر مو دہ اینجی یگ بلوگ کارای خیریہ برای مقامی مردم مونی،” اونا دہ خوش اخلاقی جواب دد۔
“شمو میتنین کہ مرہ کم دہ تفصیل بوگین کہ ای چرچ دیگہ چیز کارا مونہ برای مردم؟” پرسان کدوم۔
“بسیار خوب، ہر جمعہ بیگای شی مو دہ اینجی بائبل میخانی و صوب روزای اتوار باقاعدہ باجماعت عبادت موشنہ۔ سوای عبادت، مو دہ اینجی برای غریبا چائلڈ نرسری درے کہ اونا بچای ریزے خو کہ از یگ تا پنج سالہ استہ دہ اینجی میارہ و مو سمبال مونی و خودون شی دہ کار مورہ۔ برای غریبا بلخصوص عمر رسیدہ کہ اونا بازار رفتہ نمیتنہ مو برای ازونا دہ اینجی یگ مفت چیراٹی شاپ و ارزان بئي کیفے جور کدے تا اونا ازینجی ضروریات زندگی خو بیگرہ و سوشل گیدرینگ خو ام دہ کیفے انجوای کنہ۔ کمپیوٹر روم ناصرف برای جاب سرچ استہ بلکہ برای مفت کمپیوٹر یاد گریفتو ام استہ۔ دہ اینجی مو برای غریبا مفت خوراک تقسیم مونی و انتظامات برای ازو نفرا ام مونی کہ اونا خانہ ندرہ۔ دکانای کلان سپر مارکیٹ کہ سامانای خو بلخصوص لباسا کہ بروقت سودا نموشہ اونا دہ اینجی رئي مونہ و مو اونا رہ دہ کم قیمت سودا مونی تا غریبا رہ کومک شونہ۔ اکثر مردم عارسیای خو ام دہ اینجی میگرہ ۔۔۔۔۔۔”
 
ما دہ خاموشی اونا رہ گوشِ کدہ رئي بودوم مگر فکرای مہ مرا دہ گلی کوچای پاکستان بلخصوص کوئٹہ علمدار روڈ و بروری بورد کہ دہ اونجی درجنا امام بارہ گاہا استہ کہ متاسفانہ دروازای ازونا برای ای رقم کمیونٹی خدمت و سرگرمیا بند استہ۔
محمد یونس

محمد یونس

یونس دہ کاڈیف، يوکے زندگی مونہ و دہ کالج انگلیسی درس میدیہ۔ اونا آزرگی زبان رہ خوش درہ و بیشتر دہ آزرگی زبان نوشتہ مونہ۔ Please click below to read more stories in Hazaragi language  www.myounas.com

Leave a Reply

Your email address will not be published. Required fields are marked *