کورونا وائرس اور میری موت (2) ۔۔۔ ناظر یوسفی

اس لئے جناب کو اس حال میں دیکھ کر مجھ پر اتنا خوف طاری ہوگیا کہ میں کچھ دیر کے لئے اپنی جگہ پر ٹھٹک کر رہ گیا۔ میں نے دل ہی دل میں سوچا کہ بچے، اب تو تمہاری خیر نہیں! کیونکہ اب تمہارا پالا ایک ایسے غضبناک خدا سے پڑنے والا ہے جس کے ڈر اور خوف سے آقائی بزرگوار کی حالت بھی انتہائی خستہ ہے۔ اس آقائی بزرگوار کی جس کے بارے میں مشہور تھا کہ پیدائش کے وقت شکم مادر سے نکلتے ہی اس نے (یا علی) کا نعرہ لگایا تھا، اولاد رسول ہونے کے ناطے جس کے پرنور چہرے نے امام زمانہ علیہ السلام کی بارہا زیارتیں کی تھیں اور جسے امام عالی مقام سے بالمشافہ ملاقاتوں کا شرف حاصل ہوا تھا۔ ایسے میں تجھ جیسے گنہگاروں کی حیثیت ہی کیا ہے؟“

فرشتے نے میرے چہرے پر پریشانی کے آثار دیکھے تو اس نے میری ڈھارس بندھائی اور مجھے سہارا دے کر آگے بڑھنے لگا۔ میں نے اپنی تمام جوانمردی اور شجاعت کو سمیٹ کر بڑی مشکل سے فرشتے سے یہ پوچھنے کی جسارت کی کہ آقائی بزرگوار صاحب کیونکریہاں منتقل ہوئے ہیں؟ اب کی بار میری آواز اتنی کمزور تھی کہ میرے حلق میں اٹک کر رہ گئی۔ غالباً فرشتہ بھی باوجود کوشش کے میری بات نہیں سمجھ سکا اس لئے اپنا کان میرے منہ کے قریب لا کر پوچھنے لگا

“کیا کہا؟”

میں نے دوبارہ کوشش کرکے نہایت نحیف آواز سے اپنا سوال دوہرایا۔ اس مرتبہ فرشتہ میری بات سمجھ گیا اور کہنے لگا:

“دراصل بات یہ ہے کہ آقائی بزرگوار اور اس کے ساتھ ساتھ چلنے والے مردوں کے جس جم غفیر کو آپ دیکھ رہے ہیں یہ سب حکومت کے خاص لوگ تھے جو تمام کے تمام کورونا وائرس کا شکار ہوکر مر گئے ہیں۔ انہوں نے پہلے پہل کورونا وائرس کی وبا سے عوام کو بے خبر رکھا تھا جس کی وجہ سے وائرس اتنا پھیل گیا کہ خود ان کے اپنے وزراء، اراکین پارلیمنٹ، مشیران اور بہت سے حکومتی عہدیدار اس وبا کا شکار ہو کر مر گئے۔ اسی تسلسل میں کچھ ہی دنوں پہلے آقائی بزرگوار ایک پرتکلف ضیافت میں شریک ہوئے جس میں حکومت میں شامل خاتون وزیر بھی شریک تھی جسے کورونا وائرس لاحق تھا لیکن کسی کو اس بابت معلوم نہیں تھا۔ وہ خاتون چونکہ آغائی بزرگوار کے بہت قریب بیٹھی ہوئی تھی اس لیے اس سے یہ وائرس ان میں منتقل ہوگیا تھا اور یہ بات بھی حکومت نے دنیا سے چھپائے رکھی۔ جس کی وجہ سے اس مرض سے وہ جانبر نہ ہو سکا اور تمہارے مرنے کے کچھ ہی لمحوں بعد وہ بھی فوت ہوگیا۔

یہ باتیں کرتے ہوئے ہم تھوڑی ہی دور چلے ہوں گے جب میری نظر سامنے پڑی۔کیا دیکھتا ہوں کہ بڑے میدان کے بیچوں بیچ عرش پر خدا ایک عظیم الشان تخت پر براجمان تھا جسے چار طاقتور فرشتوں نے اپنے شانوں پر اٹھا رکھا تھا۔ میدان حشر کی ایک اور عجیب بات یہ تھی کہ وہاں میرے حواس لاکھوں گنا تیز ہو چکے تھے۔ میری آنکھیں سینکڑوں میل دور کھڑے لوگوں کو صاف صاف دیکھ اور پہچان سکتی تھیں اورمیرے کان انہیں ایسے سن سکتے تھے جیسے وہ میرے بالکل سامنے کھڑے ہوں۔ خداوند تو خالص نور تھا، اتنا مسحورکن کہ نظریں ہٹانے کا جی نہیں چاہ رہا تھا۔ خدائے بزرگ و برتر کو دیکھ کر میری تمام تھکاؤٹ اور خوف ایسا دور ہوگیا جیسا کہ میں رحم مادر سے ابھی ابھی پیدا ہوا ہوں۔ خدا کے بارے جو سوچ لے کر میں وہاں گیا تھا وہ تو ملاؤں کی ڈراؤنی تعلیمات سے ماخوذ تھا، مگر وہاں میں نے اس کا نقیض پایا۔ ملا کہتے تھے کہ خدا نے اپنے گنہگار بندوں کے لئے جہنم خلق کیا ہے، روز محشر وہ انہیں ہمیشہ کے لئے واصل آتش دوزخ کر دے گا۔ یوں ملاؤں نے خدائے ذوالجلال کی تبلیغ ایک غضبناک خدا کے طور پر کی تھی۔ جس کا کام صرف اپنے ناخلف بندوں کو سخت سے سخت سزائیں دینا ہے اور بس!