کاریئر کاونسلنگ (Career Counselling) ۔۔۔۔ محمد یونس

 
 
دیروز ہمرای بچے خو بیگاہ ساعتای پنج دہ سکول شی برای کاریئر کاونسلنگ ایونٹ (Event) رافتوم۔ خوب رش بود۔ والدین زیاد بود۔ از ریسپشن (Reception) یک کاغذ گریفتوم کہ بلے ازو مکمل معلومات دہ بابتِ ہر سبجکٹ (Subject) بود کہ کودم استاد دہ کودم ہال و کودم وقت دہ بارے مضمون خو گپ میزنہ۔
دہ مین ہال و کوری ڈور برای ہر مضمون سٹال موجود بود و مینے ہر سٹال یک استاد و دو طالبعلم بود تا والدین و طلبا رہ سوالات شی جواب بیدیہ۔ برای معلومات، مینے ہر سٹال مختلف پوسٹرز، بروشرز و لیف لیٹس ام موجود بود۔ برای ہر طالبعلم ون ٹو ون سیشن ام بود تا اونا بہتر معلومات دہ گیر بیارہ۔
مو از تمام اوّل دہ میتھس (Maths) ڈیپارٹمنٹ رافتی۔ دہ اونجی یک کلان ہال مثلی یک تھیٹر وری بود۔ سٹیج تاہ بود۔ والدین و طلبا و بال شیشتہ بود۔ استاد کہ ہیڈ آف ڈیپارٹمنٹِ میتھس بود بلے پروجیکٹر دہ بارے اہمیت، فائدہ و مستقبلِ میتھس گپ زدو شروع کد۔ اونا گوفت کہ خاندوی اے لیول میتھس دہ مستقبل قریب چی فائدا درہ و کودم نوکریا دہ دیست مایہ۔ دوران اے لیول اونا چیز درس میدیہ و طلبا دہ کودم یونیورسٹا رفتہ و خاندہ میتنہ، گوفت۔ اونا ای رہ ام گوفت کہ طلبا از بابتِ میتھس از سکول چی رقم معلومات و سہولیات گریفتہ میتنہ۔
بعد از سوال جواب، مو دہ کیمسٹری ڈیپارٹمنٹ رافتی۔ دہ اونجی ام زیاد نفرا موجود بود۔ ہیڈ آف ڈیپارٹمنٹ گفتگوی خو از یک لطیفہ (Joke) آغاز کد۔ بلے پروجیکٹر سہ جملہ نوشتہ بود۔
۱- اگر یگو چیز بوی میدہ او بایولوجی استہ۔ ۲- اگر بوی نمیدہ او فزکس استہ و ۳- اگر یگو چیز دھماکہ مونہ او کیمسٹری استہ۔
دہ پہلوی آخرنہ جملہ اونا فوٹوی یک نفر جور کدہ بود کہ گوز زدہ رئي بود۔ اونا ام تعریفای مضمون خو کد و گوفت کہ کیمسٹری طلبا رہ بعد از اے لیول دہ کودم یونیورسٹیا، کودم شعبای زندگی و دہ کودم نوکریا خاہد بورد۔ اونا ای رہ ام گوفت کہ سکول کیمسٹری ڈیپارٹمنٹ قد مختلف یونیورسٹیا بلخصوص کارڈیف یونیورسٹی رابطہ درہ و دوران اے لیول درس طلبا رہ دہ مختلف سائنس لیبارٹریا کہ دہ مختلف یورپین کشورا استہ ام موبرہ۔ تمام سائنس ڈیپارٹمنٹس از خود الگ سائنس لائبریری درہ و طلبا رہ تشویق مونہ کہ اونا دیگا کتابای کیمسٹری ام بیخانہ۔
بعد از سوال جواب، مو طرفِ بایولوجی ڈیپارٹمنٹ رافتی۔ دہ اونجی ام زیاد بیر بار بود۔ تمام نشستای ہال پور بود۔ بعد از اہمیت و فائدای بایولوجی، استاد گوفت کہ اونا طلبا رہ دہ کارڈیف یونیورسٹی ہاسپیٹل ام برای درس موبرہ و برای مزید تحقیق اونا طلبا رہ یک ہفتہ (صوب و شاو) دہ ساحلِ سمندر و یک ہفتے دیگہ دہ جنگل ام موبرہ تا مختلف حیوانات و نباتات رہ طلبا از نزدیک بینگرنہ۔
برای داخلے ہر مضمون کرائٹیریا استہ و طلبا رہ گفتہ شود کہ اونا بہتر نمبر بیگرہ تا داخلے ازونا برای متعلقہ مضمون دہ آسانی شونہ۔
دہ یوکے بلخصوص ویلز، کارڈیف، تقریبن تمام ہائ سکولہا کمپریہنسیو سکول (Comprehensive School) استہ یعنی دہ ای سکولہا اے لیول (A-Level) ام خاندہ موشنہ۔ بعد از اے لیول طالبعلما دہ یونیورسٹی برای خاندو مورہ۔ دہ اے لیول سہ سبجکٹ گرفتہ موشنہ۔
 
وقتیکہ ما سکول میخاندوم یا درس میددوم، کارئیر کاونسلنگ ایونٹ نبود۔ دہ خانہ ام کس خبر نبود کہ درست رہنمائ موکد۔ امیتر گڈوڈ معلومات گرفتہ دھکہ خوردہ پیش رافتی۔ البتہ اگر مکمل معلومات از سکول میگریفتی یقینن یگو خوبتر مضمون میخاندی۔
خبر ندروم کہ فعلن دہ سکولہا کاریئر کاونسلنگ از طرفِ سکول باقاعدہ استہ یا نہ۔ البتہ امیقس خبر دروم کہ امت سکول امی کار رہ دہ جامعہ ازمو کدہ رئیہ۔ خدا کنہ کہ دیگہ سکولہا ام باقاعدہ کاریئر کاونسلنگ رہ شروع کنہ۔
محمد یونس

محمد یونس

یونس دہ کاڈیف، يوکے زندگی مونہ و دہ کالج انگلیسی درس میدیہ۔ اونا آزرگی زبان رہ خوش درہ و بیشتر دہ آزرگی زبان نوشتہ مونہ۔ Please click below to read more stories in Hazaragi language  www.myounas.com

Leave a Reply

Your email address will not be published. Required fields are marked *